Tag Archives: fèbre buscadèira

La Fèbre buscadèira

26 Nov

La fèbre deu Japon es pas passada. Vos èi promés una seria d’article sus la literatura japonesa qu’èi començat dab Ashikari de Tanizaki. Auratz la seguida, promés. Mes qu’ic sabetz se segissetz plan aquèth blòg : soi pas tostemps au tòp de l’assiduitat. Donc per lo moment èi quitament pas començat lo dusau article…

En mei d’aquò, èi duas occupacions : m’encuenti de dus cors d’occitan per adults en Gironda e me soi gahat la frèbe buscadèira.

Los cors d’occitan, me prenen pas que 3 òras per setmana. Totun, com es lo purmèir còp qu’ensenhi, me fau hargar mon cors, setmana après setmana, shens tròp saber se aurà succès. Pr’amor la tòca per un cors d’occitan, es pas tant l’eficacitat que l’adictivitat ! Dejà qu’avem pas tròp d’aprenents, ne’us fau pas perder en rota ! Fau damorar interessant. Èi donc prés lo partit de ne pas i anar tròp hòrt (dejà se mestrejan l’indicatiu a la fin de l’annada serà una victòria !) mes de i anar ludicament. La setmana passada, èi passat una òra e mieja a parlar de cassa a la paloma, de corsa de taurs, de dança e de patrimòni locau. Dens la lenga, plan segur ! Dab lo chic qu’am vist aus cors passats, e un chic d’ajuda per lo vocabulari, se son desmesclat plan com fau. Lo còp que ven serà mei classic dab un tèxte e quauques questions, per pas perder los qu’an besonh d’un cors estructurat (òc, i en a…). Ensaji tanben de des-bearnizar los tèxtes. Pr’amor ic fau avoar, la produccion literària girondina es pas tròpa. E per jo, lo parlar vasadés es enqüèra pró viu dens son maine per i èster benlèu pas ensenhat mes au mensh muishat. Tot aquò per díser que cada setmana me fau un bon 3 òras de preparacion (pr’amor soi tanben un fanatic de la presentacion polida de la fica de vocabulari…) E puish totas las fautas que hèi suu blòg, èi pas lo drèt d’ic har en cors e sus mas ficas, donc la relectura e la recerca lexicau es obligatòria… E puish soi pas jamei concentrat, donc sauti aisidament de ma preparacion a un article de hons sus l’investitura deus agents municipaus en zònas pastoraus…

La frèbe buscadèira, es auta causa… Dab un amic, avem sengles parcèlas de bòsc a entretiéner. Son pas granas proprietats, mes vienen d’una epòca on las familhas èran mei ricas. Son pas lo resson d’un atge d’aur mes d’un atge de tèrra. Sa familha qu’en a mei que la mia, mes es sonque pr’amor la mia s’es descatida quauquas generacions mei d’òra. Enfin, vaquí, èm pas rics proprietaris (d’alhors, que sii eth o jo, possedim pas un centimètre quarrat, tot es a las familhas), aus mons despassam pas l’ectara, mes fau entretiéner l’eritatge. E autant una maison sus la laca d’Arcaishon o un apartament a Bordèu pòden crear quauques chepics dens una familha, autant per anar trencar castanhs e acaciàs lo dimenge matin a 8h sos la pluja i a pas tròp de concurréncia… Son pècs los que mancan aquò, vos vau contar una jornada tipa.

  • 8h : me desvelhi.
  • 8h15 : desbarbolhatge. Pas besonh de se lavar per l’annada, dens duas òras pudarèi la husta, la sudor, lo graish de cadena e l’essença.
  • 8h30 : truqui a la pòrta de l’amic. Esdejuat seriós dab bacon and eggs, cafè e chocolatinas.
  • 9h : èm sus los lòcs. Verificacion deu materiau. Tension e agusatge  de la cadena, verificacions de la reserva de carburant mes mei que tot de graish. Shens graish, la cadena pòt petar. Demaratge de las estroncaderas.
  • 9h30 : un aubre vòu pas càder. Son cabèir es près dens un aute. Fau tot tirar dab la còrda, a la man (pas de tractor, pas de chivau…)
  • 9h50 : l’aubre es cadut, mes minjam una mandarina per se reviscolar. Vaquí, pudi la husta, la sudor, lo graish de cadena e l’essença.
  • 11h : s’estancam 10 minutas per anar cercar d’aiga au vilatge.
  • 13h : fin de las ostilitats. Docha. Cambiament de vestits
  • 13h30 : ustras e pastèr. Dab vin roi o blanc, segon arrivatge.
  • 14h30 : despart per Pessac per véder la partida de rugbí au Bordèu Estudiant Club.
  • Au cors de la partida : L’arbitre es maishant, l’entrenaidor es ulcerat, los parents de jogadors insultan l’arbitre, los jogadors se patacan.
  • Fin de partida : cervèsa a l’estanquet deu club dab tot lo monde dab respècte. Dab un chic d’astre, i a benlèu una partida de pelòta dens lo trinquet que’s au ràs de l’estanquet.
  • A la nueit : tornar a casa. Lo vente es rond, los muscles aflaquits. La fatiga fisica (ad aquesta escala), es mei sana que la lassituda d’una jornada de transpòrt en comun, d’amassadas, de cors magistraus, d’encontras dab rompa-bassas. Lo cap es vuèit, pòdi profieitar deu repòs.
Advertisements