Archive | A Tots RSS feed for this section

Sus lo viu, Sarà Laurens

16 Ago

Sus lo viu

Èi legit, per tu lector afogat de mon blòg, un libre la colleccion A Tots, lo nº188. Se sona Sus lo viu e estó escrit per Sarà Laurens. Estó premiat en 2010 per lo Pau Froment.

L’autora

Sarà Laurens es nascuda en 1980 a Nismes, a hèit estudis d’anglés e d’occitan a Montpelhièr e es ara a Marselha. Publica de quan en quan dens las revistas OC e Reclams. Redigís de cronica per lo jornau Aquò d’Aquí.

Lo libre

Sus lo viu es un recuelh de 7 nòvas. Vau pas resumir caduna. Forra-bora, se parla d’un òme qu’ensaja de se suicidar en esperar que lo trin passa, d’un grop de joens en vacanças per hestejar la fin deus examens, un emplegat municipau ahuecat de telesusvelhança, tres vielhs que passan pas lo vrèspe a espiar Derrick, un òme que s’es inventat un mestièr originau, una secretària descomplexada e d’un grop de gangster a la Reservoir Dog… I a de que har dab tot aquò.

Es escriut d’un biais simple, dens un provençau maritime (se n’en cresi la quatau de cubèrta) aisit. Estó pas redigit dab lo TDF, mes la lenga es pas per autant vueita (es un compliment, m’agradan pas los « libres codex », que fau legir dab un descodader…).

I a causas que se poden reprochar au libre, vau pas damorar dens un consensualisme occitanista primari. Enfin, son pas causas qu’arcasti a l’autora. Es joena, es un purmèr libre. Auré avut besonh de mei d’acompanhament de la part de la maison d’edicion. Ja, un libre de 79 paginas, es pas un libre, es un liberòt… Bon enfin, es pas grèu. Çò mei grèu es una sensacion de vuèit a una pagina de la fin de cada nòva. Sembla se desalenar un chic tròp lèu. Lo trabalh de l’editor, sustot quan s’agís de joens autors, es d’agulhar. Manca pas gran causa per que los racontes sian excepcionaus, l’editor es passat a costat. Enfin, vam pas tirar sus l’ambulància, sabem on en es IDECO…

Es un libre que conseilhi. Per quauqu’un que comença l’aprentissatge de la lectura, o que vòu aver un purmèr contacte dab lo dialècte provençau, es pas mau deu tot. Enfin, vos faurà trobar un distributor per lo crompar… Domatge, esperi que l’IEO assegurarà, sinon la promocion, au mensh la venta deus estòcs d’IDECO.

LAURENS Sarà, Sus lo viu. IEO-IDECO, A Tots n°188. 2010. 79 p. ISBN : 978-2-85910-471-9