Se tèn sa lengo, tèn la clau…

Se tèn sa lengo, tèn la clau…

Es benlèu la frasa la mei simbolica de la literatura occitana modèrna. Lo Francés an Liberté, Égalité, Fraternité, los Anglés an Dieu et mon droit, los americans deus USA se targan d’un sòbre In God We Trust, e se i avèva una Occitània, lo troçòt tirat d’I troubaire catalan serè en bona plaça dens lo Top 5 de las devisas occitanas darrèir Soi tombat, soi mòrt, es la fauta a Monfòrt mes davant Haut Peiròt ! vam caminar de cap a l’immortèla…

Un chic de frescor

Fau díser que quan escrivó aquò, lo petit Frederic Mistral avó lo nàs fin. Sabi pas se coma jo etz afogats deu navèth site d’informacion jornalet.com (mei interessant que los “lo petit-nebot de Robèrt Marti s’es copat la cama dissabte passat a l’escadença de l’amassada mesadèra deus minjaires de porpre de Ceta” de la Setmana…). S’es lo cas, avetz benlèu remarcat que los articles qu’an lo mei gran succès son los que parlan d’estandardizacion de la lenga o de subjonctiu.

L’espòrt, es pas per los intellos !

Los articles sus l’espòrt tirassejan per arribar a 100 lectors. Totun, un bon occitanista es fan de rugbí, non ? Enqüèra, lo football, compreni, a despart de las vilas coma Marselha, Bordèu, Tolosa o Montpelhièr, es pas la particularitat occitana. Mes lo rugbí !! Lo rugbí !! Mei de la meitat deus club de Top14 e ProD2 son occitans, la màger part deus jogaires deu XV francés son gessits de còlas occitanas. Aus occitanistas, lor agrada mei de légir Mid’Ol o l’Equipe. Probable.

Un article de fond sus la Liga 1 de football.

Emocions puras

Soi tombat de cuu. Literalament. Èri pitat davant lo PC a cercar sus Internet quan, còp sec, l’èi vist. Mon cap comencèt de virar, mons dits se metón a tremolar, devoi deishar la mirga pr’amor lo cursor hasèva sus l’escran una dansa epileptica. Lo còr pataquejant, mas camas se trobèren vueitas, e tombèi. Es lo hred deu carelatge que me hit tornar préner mons esperits. Èi començat a mesurar lo pes de çò que pensavi aver vist. S’èra la vertat, s’avèvi plan vist, lo monde seré pas jamei lo mesme. Non. N’èra pas possible. Benlèu qu’avèvi bevut tròp de pomat. Totun, m’èri tienut. Èra donc la vertat.

Doçament, lentament, prudament, me soi sheitat, puish, chic a chic, me soi lhevat. Èi trapat una cadèira. Caderí pas dus còps de seguida. Lo cap baishat, sheitat sus ma cadèira, calculèi, shens gausar espiar l’escran. Pensèi aus mons pairs, a ma hemna, aus còishes qu’aurèi benlèu pas jamei. Tornèi véder la petita Marion dont m’ èri enamorat au CP, e la Laure, e totas las autas… Mon purmèir velò, mon purmèir albúm de Mariah Carey, la naishença de Fripouille, ma gata, e sa mòrt, lo puèg Mary, la Danborrada de 2010, lo palomèir, la setmana de campatge a Arcaishon dab los amics deu licèu, mon purmèir poton, lo còp quan avèvi plorat la mòrt de Sean Connery dens Les Incorruptibles de De Palma, mon purmèir concèrt (Tryo, a la Medoquina), Biréli Lagréne a las 24 heures du swing de Monsegur, un espinèir d’èrba qu’avèvi tubat dens mon lhèit, l’escalada au som de la glèisa un ser de guilanèu, la descenta de Richard Virenque dens lo Tormalet dab 10 minutas sus lo peloton e jo au bòrd de la rota, los Hobbits que tòrnan dens lo Comtat en eròis,… Emocions puras.  Mon còr anava resistir a çò que m’aprestèi a verificar ?

Lhevèi los uelhs. Èra aquí, davant jo. Èra de non pas créder. Qui auré podut créder aquò ? L’impossible èra vadut possible ; lo site d’IDECO èra estat actualizat.

Si si, lo pè de pagina d’arcuelh !

Bloguitge :-(

Es pas una bona navèra :

http://melanizetofre.blogspot.com/

Edit  deu 16/10/2011 :
Bon, fin finau las causas se son restablidas.
Èm sauvats !

Made in Japan

Sabi pas mes se, coma jo, etz un chic bobo-branchouille, benlèu vos agrada la cosina japonesa. E benlèu vos agrada tanben de cosinar…
Èi trobat lo blòg ginhec d’una francesa que demora au país deu sorelh lhevant :

A vos baguettes

Es fabulós, i a tota la basa, sufís de se deishar anar a la creativitat.

Lo solet chepic, es un pauc la blogaira èra-medisha qu’es, com díser,… un chic colheta-panpan…

Vos deishi dab una video sus la famosa sopa (deliciosa) que se pòt minjar dens los restaurants japonés de França :

Lo metro tanben parla en occitan !

Benlèu qu’ec sabetz pas. Totun, se legissetz l’occitan sus mon blòg, es mercés au Bloguitge pensi, donc vos passejatz de còps suu forum Occtitània, donc qu’ec sabetz. Mes s’ec sabetz pas, despuish lo 21 de seteme 2009, lo metro de Tolosa parla en occitan ! Es mauaisit d’ec créder, hein ? Picatz aquí e veiratz qu’es pas un mensontge ! S’etz enqüèra sceptics, podetz anar suu siti deu collectiu TisseÒc que s’es bolegat despuish un fum d’annadas per aquò, e mei particulièrament dens la revista de premsa ! Evidentament, i a monde que son pas urós, i a un quite grop Facebook que s’es creat contre aquèra iniciativa e que recampa mei de 9 000 personas. Mes bon, pensatz vertaderament qu’es acabada la luta ?

S’etz un chic curiós, benlèu qu’avetz dejà  picat suu boton qu’es en haut a man dreta suu mon blòg ! Sinon, es de har suu pic !

E a Bordèu, per quan lo tramway en occitan ?

Robert l’Einucent

A l’Einucent, l’i manca sonque la barba per ester lo Robert de Question Maison ! CLIC
Una bona idèia, quan lo pair partirà dens una navèra creacion (ara qu’es a acabar una asclaira), harèi un reportatge !

Femna d’òc ! Parla !

Demoretz pas suu mon blòg ont se debana pas arren, anatz suu blòg de l’OLC ont Occitaneta e’ns a hèit un article deus bons (clic) !

L’Occitània Leopard Crew

E coneishetz l’Occitània Leopard Crew ? Aquò’s çò que sauverà l’Occitània !
Enfin, m’estonarèi que l’autonomia de l’Occitània sia hilha de l’estampat leopard o zebre. Mes es ua de las causòtas que n’an pas vertaderament un ligam direct dab l’Occitània, e que totun n’en parlan. An plan vist, despuish lo temps, que lo sempiternau repic occitan=catars=campanha=bal trad interessava pas las gents. Se cau gausar har de causas navèras, pr’amor s’ac hasem pas, quauqu’un d’autes ac harà, e mau, dab un esperit dobtós.

Visca l’OLC !

Lo Bloguitge

Qu’es aquò lo Bloguitge ?

Ben lo Bloguitge, se voletz, qu’es un malhum de blògs occitans. Per en ester, cau acceptar la carta que se resuma en un article :

1) Volem defendre e difusir la lenga occitana en l’utilizar sus l’Internet per parlar de tot.

N’es pas complicat, e ?

En mei d’aquò, coma lo Bloguitge es moderne, qu’a lo son logò :

E si vosautres tanben avetz un blòg en occitan ont emplegatz la lenga tà parlar de çò que voletz, que’vs cau botar lo logò suu voste blòg , botar la tièra deus membres deu bloguitge en ligam, e vos sinhalar a un blogaire o suu forum Occitania !!