Non, anarèi pas véder Avatar. Pr’amor dejà, James Cameron m’a avut dab Alien 2 e Abyss. Après quan a sortit lo Titanic, tot lo monde i es anat 2, 3 còps pr’amor deus efèits especiaus qu’èran deus tarribles… I soi pas anat, e qu’èi plan hèit pr’amor quan l’èi vist en videò, èi plan vist qu’èra de la merda.
Uèi tot lo monde me disen d’i anar pr’amor deus efèits especiaus … No Comment…
A l'Origine
Bon, fin finau, anèm au cinemà. Soi estat orientat per un reportatge deu 13h de Fr2 (òc, qu’ec sèi es vergonhós…) Totun, a cada còp qu’un film es presentat dens un JT, qu’ec sèi, es una merda (hèi aqueth rasonament despuish qu’èi vist la presentacion de The Man in the Iron Mask dab Leonardo Di Caprio…) mes me soi dit que benlèu serè lo mensh sordeish…
Philippe Miller (François Cluzet) es un escrocaire. Passa sa vita escrocar las enterpresas d’òbras puplicas. Un dia, arriba dens una petita vila e es près per un emissari de la societat que dèu bastir l’autopista. Ça-que-là, pr’amor d’un chepic ecologic, l’autopista es estada blocada i a duas annadas, e aquò a miat lo país dens la misèra dab lo caumatge a 25%.
Los patrons locaus que’u vienen véder ende’u perpausar lor servicis, e evidentament, ende aver lo mercat, balhan “comissions” en liquide… L’òme es temptat per la moneda, e fin finau, es despaçat per la populacion qu’es estrambordada per aquesta renavida de l’emplec. D’escrocaire, lo Miller vad director de trabalhs. E fin finau, com es uman, se pren d’afeccion per las gents, e decida d’acabar l’autopista. Evidentament, se debana en França l’istuèra, e a l’epòca contemporanèa, donc bon, va i aver quauquas chepics…
Quau es l’originalitat d’aqueth film ? Ben es simple : es un chic coma se los realizators de Mrs. Doubtfire avèn pres lo partit d’en har una tragedia, e non pas una comedia. Lo subject es grèu dens Mrs. Doubtfire, non ? Es l’istuèra d’un pair que se cambia en hemna end’aver la possibilitat de contunhar de véder la soa familha. O School of Rock. Coneishetz ? Es un afogat de rock que’s hè passar per un professor dens un licèu. Es grèu lo subject, non ? Imaginatz, vòstes coishes dens una escòla dab un professor qu’a usurpat l’identitat d’un aute… Me serèi plan vist lo Jean Dujardin o lo Gad Elmaleh, qu’ariban dens un vilatjòt (es tostemps dens un vilatjòt, pr’amor las gents son mei pècs dens los vilatjòts) e que se hen passar par un director de tribalh (un chic tau com lo darrèir Bigard, ont es un escròc que’s hè passar per un curat…) Aqueth còp, l’istuèra es tant trucanta, que lo realizator, Xavier Giannoli, a decidit d’en har un film realista. Aqueth còp, pas nada tarta a la crema, ren. E totun, aquò fonciona, e fonciona plan.
Com èm amorós de la cultura, vam anar au cinemà (cercartz l’eror…) aquèra dimenjada dab la Forever Polida ! Bon, ne’vs vau pas díser mei de messorgas : avem avut duas plaças a gratís d’utilizar avan lo 17 de noveme…
Lavetz soi anat suu siti deu cinemà ende saber quaus merda, euh, quaus mervelhosas produccions passan sus la tela blanca :
2012 : Ah ! lo Roland Emmerich nos balha un naveth film catastròfe ! Coneishetz
pas Roland ? Mes si ! Independence Day (Quan los Americans nos muishan lo camin), Godzilla (Quan los Americans nos muishan lo camin 2), The day after tomorrow (Quan los Americans nos muishan lo camin 3) Coneishetz aqueths films ! I a un chic de suspens ! De que se va passar dens aqueth film ? Esperatz …. los Americans nos van muishar lo camin !!!!
Cineman : Es bèth ! Es un bon actor ! Es risolièr ! Franck Dubosc !!! Waouh ! Me demandi se aqueth òmi es en challenge dab eth-medish, pr’amor a cada còps, los films son de mei en mei pietadòs… Urosament, mercés a Camping 2, lèu parlaram d’Arcaishon !
Saw 6 : Yeah ! Òsca ! Aquèth, hasó d’annada qu’ec esperavi ! Saussissa ! Saussissa ! Saussissa ! Saussissa ! Saussissa ! Saussissa ! Saussissa ! Saussissa ! Saussissa ! Saussissa ! Saussissa ! Saussissa ! Vaquí, una critica de las constructivas !
Ièr, dab la polidèta, que’m anat dinc au Cinemà Gigant de Vilanave d’Ornon, entà anar véder lo darrièr film dab lo Joanòt Depp : Public Enemies. Avèvi espiat un pauc la critica, e lo quite Telerama l’i en botava ua bona ! Bon, soi pas un fanatic deu Joanòt, mei lo Christian Bale (American Psycho, Batman Begins, The Dark Knight, The Machinist, …), aquò’s un actor que m’agrada, es un òmi que se pòt jogar lo ròtle que vòu.
Lo realisator es lo Michael Mann, e aquò n’era pas per m’estrambordar … Le Dernier des Mohicans, Miami Vice, … E puish lo tipe a pas jamei crompat de pè de camerà e vira tostemps camerà sus l’espatla, çò que da un costat documentarí, segur, mes sus 2h13, da sustot l’enveja de tornar lo disnar …
Bon, lo film es la fin deu bandit John Dillinger, un gentleman panaire de bancas. Es un pauc Mesrine en America pendent la Grana Depression. A ua bona imatge dens l’opinion public, lo FBI es despaçat, e patin, e cofin, e se troba ua amigueta.
D’alhors, l’amigueta, es la Marion Cotillard, sabetz, lo second ròtle de Taxi 1, 2, 3, 4, 5 …. que despuish que hasó Edith Piaf dens la Môme a un cap gròs com ua citerna Butagaz. Ben es lo costat colhèta-panpan deu film. Dillinger es un gròs brutàs de machò que se harè corrigir per ua gojata de l’OLC a grans tums de Rangers dens las bassaquetas e la Marion Cotillard en es amorosa com deu son purmer pegasolet “Occitan Lenga Oficiau” …
Ma Forever Polida en es sortida en me disant “Ouais ben je préfère Medal of Honor, au moins c’est nous qui jouons !”. Vertat, la mitralheta Thomson, a ua tant grana plaça que s’amerita au mensh l’Oscar deu Second Ròtle …
 | Lutz on De que anar véder ? |
 | Òmi de la Situacion on De que anar véder ? |
 | Maime on De que anar véder ? |
| Un chic mei suu Gat … on Lo Gat-Mòrt | |
| Fotografias e mei … on Lo Gat-Mòrt |
