Senhalisacion bilingua Julh 3, 2009

E coneishetz tots la senhalisacion bilingua ? N’en vaquí quauques exemples !

E un ligam tà’u sití de l’IEO Lemosin ont se parla de la senhalisacion bilingua.

Ben non … Serèi pas jamei fotografe animalièr … Julh 2, 2009

L’Occitània Leopard Crew Junh 26, 2009

E coneishetz l’Occitània Leopard Crew ? Aquò’s çò que sauverà l’Occitània !
Enfin, m’estonarèi que l’autonomia de l’Occitània sia hilha de l’estampat leopard o zebre. Mes es ua de las causòtas que n’an pas vertaderament un ligam direct dab l’Occitània, e que totun n’en parlan. An plan vist, despuish lo temps, que lo sempiternau repic occitan=catars=campanha=bal trad interessava pas las gents. Se cau gausar har de causas navèras, pr’amor s’ac hasem pas, quauqu’un d’autes ac harà, e mau, dab un esperit dobtós.

Visca l’OLC !

La fin d’un occitanisme … Junh 26, 2009

Aquò’s lo blog que’vs parlarà pas de la mòrt de Michael Jackson. Non pas que m’en trufi, lo gojat era un fenomèn, mes bon, a nòste,  i a sordeish : Robert Lafont se morí lo orn de la sent Joan.

Robert Lafont, era lo darrèr gran occitanista gessit de la Resisténcia. Estó present per la cauma deus carboniers de La Sala, era tanben suu Larzac.  Era tanben lo darrèr umanista dens lo sens vielh deu tèrme. Un òmi que s’interessava a la politica, l”economia, la linguistica, l’istòria, … Ara, tot lo monde es especializat, e quan lo trabalh es acabat, se cau reconvertir …

N’en avem parlat suu forum Occitània !! e lo Einucent a avut ua refleccion que m’a agradat, e que’u citi pr’amor es ua refleccion justa que cad Occitan -ista -ofil deuré aver :

Qu’es la generacion qu’avia conegut la Resistença, lor fasia pas paur de despassar la revindicacion linguistica. Quin parla de “colonialisme intérieur” uèi ? La situacion de “désert français” e de “Floride Occitane” an pas desapareissut per tant.
Lo periode que seguissèt fuguèt quèu dau “culturaus” de tota mena, la generacion que daissèt los poders au Mitterrand coma analisava lo Lafont. Son las vielhas barbas de uèi, que mostran pauta blancha per gastar pas lor subvencionament. La generacion “qu’es mielh que ren”.

Uèi, se cau bolegar e non pas aver paur de har ua manifestacion en Gasconha, en Provença, o en Lemosin. Uèi, se cau reivendicar quauqu’arren de mei qu’ua ratificacion d’ua carta que serà pas jamei ratificada.

Lavetz Michael Jackson, eth, inventè lo Moonwalk, mes Robert Lafont, eth, a dubert ua pòrta.

Un tèxte de Robert Lafont paregut dens los n°149 e 150 de la revista Occitània.

Violencia policièra a Pau Març 29, 2009

Mercés de har passar aus vòstes lejedor(a)s e auditor(a)s aquera informacion

Pau, lo 27 de març de 2009

Dijaus lo 26 de març, Anaram Au Patac qu’organizè un concèrt dens lo son locau de la Tor deu Borrèu au Hedàs. Aqueth concèrt que s’ei acabat, com previst, abans 10 òras deu ser per arrespectar au mei possible los vesins deu quartièr.
La serada qu’a seguit, coma de costuma, a l’estanquet de la Tor deu Borrèu, pendent las òras d’ubertura legaus, e dab un centenat de personas a l’exterior, shens nat problèma particular a signalar.

A miejanuèit, mantuns vehicules de polícia que son baishats dens lo quartièr deu Hedàs, e qu’an interpelat un joen. En seguir, los policièrs qu’an jetat 4 a 5 bombas lacrimogènas de cap tau monde amassat per davant l’estanquet, shens nada requerida ni avertiment.

Ua militanta d’Anaram Au Patac, ensenhanta dens lo parçan tolosan, qu’estó trucada per la BAC, Brigade Anti-Criminalité. Evacuada a l’espitau, lo medecin de las urgéncias que li a remetut un certificat medicau dab 5 dias d’ITT. Qu’ei dens l’incapacitat au dia de uei d’utilizar la man esquèrra.

Cap a d’aqueras violéncias policièras, cèrtas personas an jetat tres canetas au ras de la polícia. Un cinquantenat de personas, dens l’incapacitat de respirar en per’mor deus gas jetats dens las carrèras vesinas, que’s son amassats dens lo locau noste. Un joen qui’s volè esluenhar qu’estó arrestat dab violéncia, mantuns testimònis que l’an vist la matraca devath lo còth, los uelhs virats.

En detz dias sonque, la repression policièra a Pau qu’a utilizat tres còps gas lacrimogènas – dus còps contra los estudiants – dab ua violéncia de non pas compréner. Aqueras faiçons inadmissiblas que son de hicar dens un contèxte exagonau de repression sistematica de tot movement popular, a l’imatge deus dus joens, a Naoned/Nantes e Tolosa qui’s son perduts un uelh arron tirs de flahsball. La Brigade Anti-Criminalité, dab lo pretèxte de har arrespectar la lei, utiliza metòdes de cocarros.

Anaram Au Patac, dab lo sostien de la Joenessa Marxista de Pau, que denóncia un Estat policièr qui sembla non pas mei suportar tota opausicion politica.
Atau qu’aperam a manifestar contra las violéncias policièras aqueste diluns lo 30 de març a 6 òras deu ser, per davant la prefectura deus Pireneus Atlantics.

Hartèra de la violéncia d’Estat ! Cò que volem: justícia e libertat !

L’annada 2008 Decembre 26, 2008

L’annada s’acaba. E òc. Ua meishanta annada. Lo gran es mòrt, mei un detzenat de gens deu vilatge. Un amic, 33 ans, a avut la meishanta idèia de morir dens un accident de veitura.  Lo can, aquèth brave pèc, a crevat còp sec, en tres jorns, d’ua puta de malautia, quitament pas dens un accident. En mei d’aquò, me soi engatjat dens ua escòla a 5000 € l’annada, e per 2 ans, e tot aquò tà aver lo niveth lo mei baish dens lo sector deu torisme … Guida interprèt regionau (se soi guida d’Aquitània, pòdi pas trabalhar dens las autas regions, quitament pas dens los despartaments limitròfs). En mei d’aquò, l’ensenhament dens aqueth sector es catastrofic tà quauqu’un tau coma jo, sensibilizat a la cultura deu pòple, lo “patrimòni vernacular” com se dit dens lo mitan. Çò melhor de parlar de las plajas de las Lanas, de las estacions de ski deus Pirenèus o de las baumas pre-istoricas de la valada de la Vesera. Valors seguras … E lo niveth deus estudiants es extraordinarí : s’avetz lo malastre de díser que los Bascós caçavan las balenas o de saber que l’Aquitània es compausada de 5 despartaments (Gironda, Lanas, Pirenèus Atlanticas, Òut e Garona e Dordonha), tot lo monde vos ten per l’assabentat de la classa ! En mei d’aquò, las lengas regionaus son estadas reconeishudas per la Constitucion de l’Estat francés, es a díser plaçadas dens un musèu. (Mamie, quan eras pitchona, parlavas lo musèu !)

Totun, a maugrat de tot aquò, aquèra annada estó la mei bona annada de la mia vita (ei 24 ans, çò que comença de har de que comparar !) Lo purmer de genier, ei avut la bona idèia de fringar ua gojata fabulosa, inteligenta, volontara, bona codineira, bèra, … e l’ei gardada ! Me balha l’enveja de marchar, de’m quilhar.

Per resumir, ua annada de las bonas, la vida, que.

Serada occitana en Sud-Gironda : la convivencia n’es pas ua legenda. Novembre 17, 2008

E coneishetz lo Sud-Gironda ? Ièr, qu’em anat tà Pompejac, a costat de Vasats, tà participir a ua serada occitana. A l’entorn de la compania Gric de Prat (un grop que vira plan en Gironda), lo Sud-Gironda occitan qu’ensaja de s’amassar, e com soi handmade in Sud-Gironda, que’m calèva pas mancar aquò.

La serada era basada suu principí de l’auberja espanhòla : cadun que pòrta de que minjar (e béver …), e fasem virar. Era, me sembla, ua purmèra per los Occitans d’aqueth parçan.

Ei descubert çò qu’apèran la convivencia. (Dinc adara, pensavi qu’era ua legenda occitana, inventada per un occitanista afogat de marketing …) I a avut quauquas discutidas, sens jamei imposar ua ambiança de conferencia o de desbat. Lo monde era aquí per escambiar, per encontrar. Aprep lo repas, los Gric de Prat an tocat la flaüta, la guitara e la bateria e un baletí s’es improvisat.

Ei minjat, ei bevut, ei dançat (un chic …), ei encontrat de monde, ei parlat. Que de mei ?

Lo còp que se ven que serà lo 31 de genier a Preinhac o Pujòu de Ciron. Esperam mei de monde.

Highway To Pamparigosta Octòbre 1, 2008

Meste Verdié Setembre 28, 2008

Vaquí la debuta d’ua pèça de Meste Verdié, poète bordalés de l’epòca de la Restauracion, escrivuda en 1819.

Cadichoune e Mayan
Ou les doyennes des Fortes en gule daou mercat
Dialogue recardey, en patois bourdelès.

CADICHOUNE.
Dis- me dounc, aco’s tu, machante recardeyre,
Que bas me descrida sur toute la ribeyre ?
Te dibén quaoucarrés, dis dounc, cougot lentous ?
Baey te desbarbouilla, baey, mus escuragnous,
Baey douna lous poulets a quinze sos la père.
Counèchen toun commerce : as bet tourna, ma chère,
Tout lou mounde sap bien, a ne pas en douta,
Que n’es pas lou mestey que te fey fignoula ;
E ferès bien millou de jouga de tous restes
Que de t’entreteni des persounes hounestes.

MAYAN.
Escoute, Cadichoune, aco’s a jou qu’en bos ?

CADICHOUNE.
O, positibement, madame rogue-l’os !
Boli te fa prouba si suey une friande,
Une ibrougne, un fumey, un mus a la groumande.

Lo Gat-Mòrt Setembre 25, 2008

Lo Gat-Mòrt a Castre (Gironda)

Un arriu tipic deu Sud-Gironda.

Dauna e senher, non non non ! Aqueth arriu n’es pas un sanctuarí ont se van negar los gatòts quan vaden … Non non Lo Gat-Mòrt, en francés seré “le Gué Mort“, donc en occitan gascon : lo guà mòrt.